台語譯文：
黃銘昌1952年佇花蓮瑞穗出世，1975年對中國文化大學美術系出業，1977年去法國，1984年得著法國國立高等巴黎美術學院高等油畫文憑（bûn-pîn）。蹛佇法國7年這段時間，伊修習古典油畫技法，共寫實描繪的功夫拍甲真在，開始共生活中四箍圍仔的細節當做斟酌觀察佮創作的對象，用超真實的景物來傳達生活中微微的情緒佮精神的哲思。1985年轉來臺灣，接紲伊佇巴黎創作的路線來表現臺灣生活中上蓋四常的各種事物；彼當時伊的畫室徛佇臺北縣新店溪崁的一棟公寓的四樓，對徛窗和陽台看落去，就看會著一大片青翠的稻田，這片佇都市墘（too-tshī-kînn）上尾的一片水田（tsuí-tshân），一年四季、日時暗時、好天歹天攏有無仝的風景，是伊這段時間主要的題材，1986年的《遠眺（uán-thiàu）系列》是這个時期頭一組的創作，嘛成做黃銘昌紲落來《水稻田系列》發展的原型。
王雅玲，國立臺灣美術館典藏詮釋資料，2025。
這件作品看著若像是以女性（lú/lí-sìng）的背影（puē-iánn）做前景，手並欄干遠遠咧看外口這規片的水田，其實是對室內畫家的視角所開展的視覺運鏡，所以畫面內底形成對內至外、才閣引視線來到遠景無邊無墘的多層次空間。畫中的女子輕鬆溫柔的姿勢佮神態，予這幅作品成做清閒、四序、感性的基本調；毋過，具體化「遠眺」這个視覺內面的意思，是寄托佇中景一重疊過一重、一四界攏田岸路，規片青錦錦的水田，閣有遠遠山邊雲影內底彼𪐞迷人光焱的日頭光。黃銘昌用寫實法（siá-si̍t-huat），酌斟觀察、幼絲仔畫，一筆一畫沓沓仔畫出稻穗（tiū-suī）親像海湧，誠有節奏咧滾絞的景緻，真巧妙共巨視開闊的場面佮微觀的傳移描寫相結合，其中順頭理路的部份佮活氣動態的部份相交織，閣加上曠闊、溫馴、親和的氣氛，毋但是畫家對臺灣風土（Tâi-uân hong-thóo）的觀察佮演繹，嘛表達出伊對生活佇這片土地深深的感情。
出處：王雅玲，國立臺灣美術館典藏詮釋資料，2025。