台語譯文：
飼牛囡仔（tshī-gû gín-á）咧騎水牛（tsuí-gû）真清閒，據在牛共伊載咧行，伊坦邊身歕𥰔仔，一隻鳥仔輕輕佇伊邊仔共應聲。這是一幅農業社會（lông-gia̍p siā-huē）生活的紀錄，這款畫草地風光（tsháu-tē/tuē hong-kng）佮農家生活情景的題材，佇1940佮1950年代誠時行，為彼个食苦當做食補、歡喜做甘願受的時代留下無數予人感動的見證。這件作品的構圖豐富密實，刻畫甲真幼膩，用整體景物的安排，照順序共行佇田岸路的飼牛囡仔佮水牛、水田、照落來的日頭光、遠遠的山，憑頭（pîn-thâu）相疊（sio-tha̍h）層次分明，全然掌握空間的深度，毋但對景物有寫實的描寫，閣加添淡薄仔詩意，有影觸著觀者的心肝穎，畫面光影的經營嘛有接紲陳其茂伊一貫致心的安排。活用刀具鑿出多樣化的線條，配合複雜閣有理路的構圖，畫面內底烏白對範（tuì-pān）的中性色調。儼硬（giám-ngē/ngī）的水牛粗勇的跤蹄仔踏著誠有力，水牛是後壁彼塊肥閣媠的水田佮厝宅的功臣，景物的安排有呵咾的意思，成做一个象徵性的英雄 圖樣。
王雅玲，國立臺灣美術館典藏詮釋資料，2025。