台語譯文：
廟佮市仔（tshī-á）是咱傳統社會四常人上濟的所在，這兩所在共咱的生活佮信仰扞做伙，是古早庄頭的要地佮重要的地標，早前咱臺灣的廟一般攏會有市仔，廟埕（biō-tiânn）就是民眾定定來遮賣家己種作的作物、抑是來買民生用品的集散地（tsi̍p-sàn-tē），嘛通佇遮食著真濟點心好食物（hó-tsia̍h-mi̍h）。這張版畫（pán-uē）作品所畫的就是這款景緻，用鑿刀代替畫筆，刻畫出常民生活（siông-bîn sing-ua̍h）的一部份，畫面的線條濟閣密，十分的精彩，作品的寸尺是真細塊，佇遮爾狹的空間，會當刻甲遮幼路斟酌，有影是無簡單，毋但按呢，作者囥入去的視野是不止仔曠闊，予咱無法度做一擺就共廟口佮廟裡密喌喌的人物看甲透，所有的細節攏袂凊彩，用捲鑿（kńg-tsha̍k）鑿出來一塊一塊白色的肥圓形，佮幼絲的橫逝經（kinn）一片好風日的天出來，予咱看會出來彼當時應該算是大型建築的廟寺，用優美的天際線（thian-tsè-suànn）來表現伊的壯麗，翹脊（khiàu-tsit）的四尾剪黏（tsián-liâm）的龍嘛刻甲真詳細，剪黏是廟的建築幼路閣媠的手工藝，會共顯目的瓷仔剪做一片一片，才閣黏佇塗坯頂面妝娗造型。畫面左爿下仔有刻其茂兩字，早期的作品常在用這款方式徛名。
賴欣宜，國立臺灣美術館典藏詮釋資料，2025。