台語譯文：
陳石岸，1930年出世佇臺中，1951年省立臺中師範學校畢業，到1987年退休，一世人攏佇小學教冊。青年時期因為共開相館的親情（tshin-tsiânn）鬥洗相，開始對攝影（liap-iánn）有興趣。戰後，對等欲遣返的日僑遐買著伊頭一台相機，開始翕相。1959年，參加臺中市攝影學會，佮陳耿彬、林權助這寡人是做伙求進步的好朋友，1960-1970年代上蓋活動，彼當陣國內外各大出名的攝影比賽攏定定著等。伊上𠢕翕寫實風格（siá-si̍t hong-keh）的相片，有辦過個展「我的攝影世界」（1995）、「逐漸消失的影像－陳石岸攝影展」（2007），2008年過身。
老人佮囡仔的日常生活，往往是早期寫實風格攝影師翕上濟的題材。這張相片翕查某囡仔嬰（tsa-bóo-gín-á-inn/enn）咧學阿婆（a-pô）洗衫（sé/sué-sann）的模樣，阿婆笑微微看這个阿孫的，啊若阿孫的是誠正經，表現囡仔的純真佮序大的疼惜，是一張充滿情意的作品。兩人的姿勢差不多毋過角度無仝，佮看的人成做三个無仝方向的視線，閣有水桶佮人物嘛是一个三角構圖（sann-kak-kòo-tôo），予這張相片毋但畫面真平均，嘛共咱的視線牽牢牢。
出處：賴欣宜，國立臺灣美術館典藏詮釋資料，2025。