台語譯文：
鐘有輝1946年佇臺北出世。1970年考入臺灣師大美術系夜間部。了後受著廖修平的啟蒙，開始創作版畫。1974年，因為廖修平提議，就佮師大美術系前後期的同學，成立「十青版畫會」，互相研討版畫的技藝，由鐘有輝擔任創會會長。1977年得著臺陽美展版畫金牌獎、1981年得著臺北市美展版畫第一名、1983年得著中華民國版畫學會金璽獎等等重要的獎項。1984年閣因為廖修平的鼓勵，翁仔某前後去日本的筑波大學讀碩士。日本留學期間，接觸著先進的科技藝術佮現代版畫，開闊伊的見聞佮觀念，轉來臺灣就推廣版畫的新技術，閣創設臺藝大版印中心。1998年擔任中華民國版畫學會理事長，開拓發展臺灣佮國際的版畫交流。
這件作品是平版版畫（pênn/pînn-pán pán-uē），金屬PS版（kim-sio̍k PS pán）。本底是商業印刷咧用的，藝術家共提來做藝術創作的媒材；先將影像分析做紅、黃、藍、烏四色，來做濫色套色的基礎，經過網屏（bāng-pîng）分析，表現網點有櫳（lang）有密的結構。鐘有輝佇色盲片（sik-bông-phìnn）面頂閣畫物件抑是用剾的，來提升畫面的藝術性。這馬製作PS版已經會當直接輸出佇金屬版，毋免閣經過感光顯影（kám-kng hián-iánn）。〈就是這一刻〉是1976年的作品，是咧表現市民（tshī-bîn）等公車（tán kong-tshia）的情境，畫面上頂面有無仝的時間（sî-kan），象徵生活（sing-ua̍h）的無閒佮性命的活力。畫面中心的四箍圍仔，略仔有墨槌（ba̍k-thuî）撚墨留落來的痕，閣較看會出是用平版，兩爿有拍空的造型，是PS版套色對版需要用的定位。
出處：賴欣宜，國立臺灣美術館典藏詮釋資料，2025。