台語譯文：
葉火城的創作因為受著石川欽一郎的影響，強調實地、實物的寫生（siá-sing）精神，伊畫圖的題材，早期注重人物佮靜物的主題，筆觸幼膩恬靜。戰後，改畫風景較濟，風景的題材方面，伊主要攏咧研究色彩佮性質的表現，畫技那練、嘛綴咧那有信心，筆觸閣較飄撇自由，特別針對建築物、岩石、橋樑、山岩等等的對象，定定攏會用較厚漆，嘛佮意用畫刀，而且筆觸的表現嘛較整齊，通予物件的質感加較有份量佮堅實，毋過若是咧畫天頂、流水、海洋佮樹林等等，就會較薄漆，落筆較輕、用暖色調，嘛予色彩佮皮肉毋但干焦調和，閣有趣味佮變化。〈朝〉這件作品，是畫早時仔窗仔（tháng-á）外後埕（āu-tiânn）的風景佮窗仔墘頂面的靜物，近景窗仔邊桌頂的靜物、埕裡的植物（si̍t-bu̍t）佮遠景的厝，形成一重一重有深度的空間安排，原來可能是刁工共厝內囡仔的𨑨迌物仔—飛行機（hue-lîng-ki）、船（tsûn）佮戰車（tsiàn-tshia）模型提來排，彼當陣戰爭（tsiàn-tsing）的氣氛，這个創作予人聯想著作者是欲暗示戰爭的時局，用平靜的後埕佮戰事動亂的強烈對比，來表達畫家彼時配合「臺灣總督府美術展覽會」時局色彩（sî-kio̍k sik-tshái）彼款矛盾（mâu-tún）的心情。
出處：賴欣宜，114年國家語言推廣經典作品多元語言詮釋轉譯計畫，2025