台語譯文：
湯思泮（1917-2003），出世佇江蘇崇明，中國江蘇省立農業專門學校出業。20歲開始自學攝影。1954年佮李鳴鵰、朱雄飛、陳雁賓、單建周等5个人，隨个去邀請黃則修、蔡增裕、莫一明、查士芬等總共20个人，發起成立「臺北市攝影會」，捌擔任常務理事、監事等職，佇臺灣大學攝影社佮攝影補習班做教師，嘛做過《北攝月刊》雜誌主編。1995年佮1998年擔任過教育部文藝創作獎攝影類評審委員，1991年佮1996年，伊的作品分別予臺北市立美術館佮劉海栗美術館做典藏。2002年舉辦頭一場攝影個展「中國古老的社會景觀」，隔轉年攝影作品參與國立歷史博物館「回首臺灣百年攝影幽光」展覽。
這件作品翕的是農村（lông-tshuan）的粟埕（tshik-tiânn），粟埕主要就是收冬了後欲用來曝五穀的所在。畫面內底有四隻雞仔（ke/kue-á）當咧捅食，婦人人（hū-jîn/lîn-lâng）戴瓜笠仔、攑掃帚咧摒塗跤，粟仔佮沙仔蓬蓬坱，好親像時間佇遮擋恬（tòng-tiām）。建築物的邊仔有一个查埔囡仔，穿吊帶（tiàu-tuà）長褲，佮婦人人平平褪赤跤（thǹg-tshiah-kha），純真的眼神咧看鏡頭，發現攝影家當咧記錄翕相。婦人人、囡仔佮雞仔，光佮暗的明度反差看起來有真明顯的對比。草地農村日常的風景，日頭斜西（tshiâ-sai）的光影，是遐爾仔清閒自在。
賴欣宜，國立臺灣美術館典藏詮釋資料，2025。