台語譯文：
　　謝三泰1958年出世佇澎湖。年拄年做新聞攝影的工課，捌食過《自立早報》、《自立晚報》、《黑白新聞週刊》、《新臺灣週刊》和《勁報》等等媒體的頭路。80年代伊的鏡頭紀錄解嚴前後的臺灣社會：520農民運動、國會改選、頭擺民選總統等等。後來是共焦點集中佇常民、勞工、弱勢佮環保等等遮的議題，出版《勞動尊嚴》、《舞蹈空間》、《走拍台灣》、《吼叫一九八九》、《鹹水煙：澎湖印記》等等的攝影集，展出個展：「勞動尊嚴」（2003）、「我的志願」（2011）、「走拍臺灣」（2016）等等。
這張相片的主角是一个手面趁食的澎湖（Phînn/Phênn-ôo）勞動女性（lô-tōng-lú-sìng），坐佇花點花點的貨車（huè/hè-tshia）車斗（tshia-táu），伊規身軀用布巾仔（pòo-kin/kun-á）、帽仔（bō-á）和手囊（tshiú-lông）包甲密喌喌。𪜶毋但愛佇港口做工，嘛著愛做田，澎湖的氣候遮爾嚴峻，姑不而將用這款打扮來抵抗炎日佮海風。澎湖是謝三泰的故鄉，嘛是伊長久以來影像寄託感情的所在。當當伊擔頭用仰角（gióng-kak）翕這位趁工課閬縫歇喘的查某人，用透視法（thàu-sī-huat）的構圖佮相片裡的主角離較遠淡薄仔，嘛留予前景開闊的感覺，閣看會著後壁的天，予這張人相（lâng-siōng）有歌頌（ko-siōng）佮尊敬的意思佇內底。
出處：王雅玲，國立臺灣美術館典藏詮釋資料，2025。