台語譯文：
陳進這幅膠彩畫是佇1946年第1屆省展（síng-tián）用〈孔子祭〉做題目，以國畫部評審委員的身份參與展出的示範性作品，畫中描畫戰後初期（tsiàn-āu　tshoo-kî）拄對中國來臺灣的一陣毛斷（môo-tn̄g）的女士（lú/lí-sū）徛佇孔子廟（Khóng-tsú-biō） 正殿門喙，穿旗袍，頭髮捋做彼年時行的款式，看著誠高尚。正殿內底看會著一陣穿白衫烏裙的中學女學生（lú/lí-ha̍k-sing），當咧排隊向至聖先師孔子行禮。殿門內緣倒爿頂仔有吊一个寫紅字的「萬世師表」（bān-sè-su-piáu）的鴨卵形鼓仔燈，表示這是祭孔（tsè-Khóng） 儀式的場景。這是目前咱所看著的，陳進以女性特有幼膩的眼光，觀察、取掠、描畫戰後初期以上海為主的貴夫人，帶來穿插、頭毛型，猶閣有配件等等細節方面的改變。第1屆省展，陳進有參展的作品是〈幼兒〉、〈讀書〉、〈孔子祭〉這三件。雖然第1屆省展無正式出版作品圖錄，毋過，1946年10月30日發行，由藍蔭鼎主編的《臺灣畫報》（第1屆臺灣省美術展覽特刊號）獨獨揀著其中這幅〈孔子祭〉刊登佇內底，顯示出這是陳進三件出品第1屆省展作品當中，予人看做是上蓋有代表性的一件，嘛是戰後初期陳進階段性的代表作之一。
出處：王雅玲，國立臺灣美術館典藏詮釋資料，2025。