台語譯文：
1930年嘉義升格做嘉義市了後，增設公園等等現代化的設施，對觀察自然真有熱情的陳澄波，定定共地方佮現代性的元素相敆，有真濟件嘉義公園（Ka-gī Kong-hn̂g）的作品留落來。其中〈嘉義遊園地〉共現代化的物件提挕捒(hìnn-sak)，將自然、人物佮動物合做一伙，現出萬物和諧共存的環境。大大欉的鳳凰木（hōng-hông-bo̍k）囥佇畫面中央若雨傘，成做真大片的弧面彎線（hôo-bīn uan-suànn），陳氏用四界漂徙的透視法，將懸大的鳳凰木壓縮佇畫面內底；樹椏頂面的枝葉紅花，陳氏嘛用弧形、彎線的手路來表現，旺盛的性命力是衝甲關袂牢。樹蔭後面，服侍弁才天的弁天堂若有看見若無看見，彼陣著愛經過紅色的隱痀橋（ún-ku-kiô）/ 圓拱橋（uân-kong-kiô）才會得參拜，頭前景的鵝仔佮仙鶴（sian-ho̍h）佇弁天池內底耍水，佮紅豔的鳳凰花互相添色，整齊順序的佈局展現陳氏斟酌描畫地方信仰、人情佮風土的痕跡，本作佇2015年登錄做「重要古物」。
出處：賴欣宜，國立臺灣美術館典藏詮釋資料，2025。